АРВАЙХЭЭР СУМЫН РАШААНТ 8 ДУГААР БАГИЙНТОВЧ ТАНИЛЦУУЛГА

Газар нутгийн байрлал: Тус баг 1996 оны 12 дугаар сард Өвөрхангай аймгийн ИТХурлын 03 дугаар тогтоолоор үүсэн байгуулагдсан. Анх Арвайхээр сумын 3 дугаар багийн 26-41 дүгээр гудамжны 365 өрх, 4 дүгээр багийн 1-8 дугаар гудамжны 125 өрхийг харьяалуулан нийт 490 өрх, 1890 хүн амтай байгуулагдаж байсан.

Арвайхээр хотын хойд хэсэгт Гандангийн засмал замаас зүүн тийш Өлзийт овооны урд хэсэг, БОЭТөвийн хойд дэнж, ЕБ-ын 1 дүгээр сургуулийн хойд болон зүүн хэсгийн гэр хорооллын өрхүүд, 329, 330, 332, 335, 343, 466, 339, 340, 341, 342, 345 дугаар байрууд хамаарах бөгөөд урьд нь дан хашаа гудамжит гэр хороолол байсан бол 2012 оноос орон сууцжилт явагдаж одоогоор нийт 11 орон сууц ашиглалтад орлоо. Нийт өрхийн 25 хувь нь орон сууцанд, 75 хувь нь гэр хороололд амьдарч байна.

Өрх, хүн ам, мал: 2022 оны жилийн дүнгээр нийт 875 өрхийн 3127 хүн ам, түр оршин суугч 144 өрхийн 372 иргэн байна. Малтай өрх 136, үүнээс малчин өрх 84, мал бүхий 52, нийт 18958 мал тоологдсон байна.

Аж ахуйн нэгж, албан байгууллага: Багийн нутаг дэвсгэрт Барилга, хот байгуулалтын газар, “Түшиг дөлгөөн” ӨЭМТөв, 250 хүүхдийн 8 дугаар цэцэрлэг, “Жим” хувийн цэцэрлэг, 7 давхар “Арвай палас” зочид буудал, “Шунхлай” ШТС, Оёдлын үйлдвэр, “Сод”, “Элит”, “Солонго” зэрэг худалдаа үйлчилгээний төвүүд, авто угаалга, халуун усны газар үйл ажиллагаа явуулж байгаагийн зэрэгцээ Арвайхээр хотыг цэвэр усаар хангах  “ЦЭВЭР УСНЫ ТӨВ САН” байрладаг.